乘巴士環遊新加坡

個幾星期前乘巴士暢遊半個新加坡後，玩上癮，發覺不但可消磨時間；又可認識新加坡各區地理位置；而且飽覽沿途風貌；最重要的是消費低廉，於是今日又嚟玩過。

跟上次開始時隨意登車不同，今次預先規劃，決意要環繞新加坡一周。首先，中午12:18在住處附近乘西行85號巴士到「義順」（Yishun）吃午飯，飯後乘856號到「兀蘭」（Woodlands）。這裡發生了一段小插曲，原本計劃在「兀蘭」乘925號到「蔡厝港」(Choa Chu Kang)，轉172號到「西裕廊」(Jurong West) 的「文禮」（Boon Lay），不過唔知係咪我眼花，竟然上錯咗架925C（但車頭明明打出925！），925C係星期日及假期特別線，係到「雙溪布洛濕地保護區」（Sungei Buloh Wetland Reserve）的循環線，到咗「雙溪布洛」先知道「瀨嘢」，唯有原車返回「兀蘭」，嘥咗一個鐘頭，冇計，當遊車河啦───事實上我哋係遊緊車河喎！（其後上網了解，原來925只在平日及星期六到「蔡厝港」，星期日及假期只去到「雙溪布洛」就轉回「兀蘭」，係唔會去到「蔡厝港」的。）

回到「兀蘭」，改乘178號直接到「文禮」，然後轉174號到「新加坡中央醫院」於New Bridge Road旁的巴士總站，再轉2號到「樟宜村」（Changi Village），這時已是晚上8點45分，原本計劃黃昏時抵達這裡，走到樟宜尾木棧道觀日落，浪漫一番，但時間上大失預算，太陽伯伯唔等我哋，已經返咗屋企瞓覺。

我們在「樟宜村小販中心」（Changi Village Hawker Centre）食晚飯，飯後乘109號到「盛港」（Sengkang）轉85號回家，下車時是22:21pm。

今次巴士之旅環繞了新加坡一個大圈，全程147.29公里（km），共8小時（不包括午晚飯及於各巴士總站商場找廁所的時間），8程巴士車費共用了SGD7.18，折合港幣約$41.85，在香港來回一程962都差唔多價錢啦！抵玩！

「義順」（Yishun）的 Northpoint Shopping Centre

「西裕廊」(Jurong West) 的 Jurong Point 商場一角模仿香港街道

「樟宜村小販中心」（Changi Village Hawker Centre）