今天下午，正懶洋洋咁坐晌家中籐椅上睇報紙兼瞌眼瞓，突然固網電話鈴聲響起，看來電顯示，係「Long Distance」......
接聽：「喂！」
電話那邊傳來一把男聲：「喂！你知唔知我係邊個？」
哈哈，「電話騙案」在新聞或「警訊」節目上就聽得多，今次竟然發生晌我身上，阿叔得閒，即管同你玩吓......
我：「你係邊個？」
佢：「你估吓。」
我：「......估唔到。」
佢：「咁都認唔到我把聲？」
我：(詐作好努力咁諗)「er......認唔到。」
佢：「我係你嘅親戚喎！」
我：「咩親戚呀？」
佢：「晌大陸嘅親戚喎！」
我：(更努力咁諗)「er......咦...係咪阿牛呀？」
佢：「咪就係阿牛囉，我而家晌深圳呀。」
我：「晌深圳做乜呀？」
佢：「有啲嘢做。」
我：「哦！」
佢：「聽日我去香港，得唔得閒出嚟飲茶？」
我：「聽日我唔得閒喎，約咗人喎。」
佢：「約咗邊個呀？」
我：「你唔識嘅。」
佢：「上晝定下晝呀？」
我：「全日喎。」
佢：「我留低我個電話俾你啦，你後日搵我呀！」
我：「好呀！等我攞枝筆先......講啦！」
佢：「13071671430。」
我：「咁長嘅？」
佢：「大陸電話係咁長架。」
我：「哦！」
佢：「你個手提電話幾號？」
我：「我都冇手提電話嘅。」
佢：「唔係呀話？手提電話都冇？」
我：「係呀，冇乜必要。」
佢：「er......而家方唔方便講嘢呀？」
我：(哈，終於嚟料嘞！) 「冇問題，講。」
佢：「可唔可以借住幾千蚊俾我呀？」
我：(乾咳一聲)「咳......乜講啲咁嘢呀。」
佢：「幾千蚊啫。」
我：「你都知我咩環境啦，邊度搵到幾千蚊借俾你呀？」
佢：「真係冇？」
我：「真係冇喎。」
佢：「哦！」
我：「係咁先啦。」(收線)
