「除笨有精」，係講香港小商人嘅智慧。
眾所周知，最近一兩年香港百物騰貴，食得又加、唔食得又加，升斗小民叫苦連天，但都無可奈何，唯有盡量慳啲使啦。
話說本人工作地點附近一間$10雲吞麵店，本人間中都會幫趁，貪其抵食夾大碗。每天午飯時間，該店都人頭湧湧，等位的人排隊排到出街。
早兩個月前，該店每碗加價一元！唔算係好多啫 (10%)，但唔好睇少呢一蚊鷄，人龍即刻唔見咗，雖然不致於門可羅雀，但肯定生意額大跌。
兩星期前，該店恢復舊價，每碗十元，講你都唔信，啲客又返晒嚟啦！條人龍似乎仲長咗添。
「密食當三番」呢個道理好似好顯淺，但唔係人人會明白，明白嘅人又未必做得到，尤其是一些大機構的主事者，像某某隧道，聲聲耍向股東交代，明知減價會増加客量，也不減反加。
相比上述麵店小商人，不知何者聰明些呢？照理大機構的主事者身居高位，也不會是省油的燈，冇理由唔明呢個道理，點解唔減價爭客？究竟條數點計？自問愚蠢，諗唔通……(諗得通就唔使到今時今日仍然打份牛工啦！哈。)
