台北市立動物園面積很大，由於時間關係，行咗唔夠五分一 (都行咗成兩個幾鐘)，只遊過台灣動物區、昆蟲館、蟲蟲探索谷及夜行性動物館，睇埋樹熊，就要走了。 最過癮係嚮昆蟲館裡面嘅蝴蝶園，啲蝴蝶唔怕人，會停嚮遊人手上、頭上 ，睇到唔願走。
遊罷動物園，搭捷運到忠孝復興站的SOGO復興店Food Court午餐，餐後回酒店check-out，拖住啲行李行幾條街，到南京東路站搭捷運 (又係捷運？冇法啦，又要平又要快。)到台北火車站，轉高鐵，落台中。
高鐵真快！唔駛一粒鐘，就到達台中站 (台鐵要幾耐？唔知噃！)。高鐵台中站位於台中市和彰化市中間，距台中市市中心很遠；又由於我們book的台中中信大飯店在北屯區后庄路，頗偏僻，為咗慳錢，於是先乘高鐵免費穿梭巴士去台中市市中心SOGO，才再打的去酒店 。
安頓好，洗個面 (或沖個涼)，搭公車往市中心，沿途欣賞台中市街景，發覺除了檳榔店多之外，通街都係「太陽餅」專賣店，蔚為奇觀。一番折騰後，天黑了，於台中火車站附近一間小店晚飯，我吃牛肉麵，佢哋食咩？唔記得咗嘞。飯後行街，行到中華路夜市，攤檔在中華路兩側馬路邊，剛剛開檔，只見汽車、機車 (綿羊仔)在馬路中飛馳，沙塵滾滾，食物冇遮冇掩，你食埋我嗰份啦！
打道回府 (酒店)，在中正路找公車站時，發現有一間名叫「坂神本舖長崎蛋糕」的店舖，舖面不大兼較殘舊，但櫥窗貼滿甚麼甚麼「全國只此一家並無分店」、「每人每次限購600元」、「不准攝影」等告示 (好串！)，店內人頭湧湧，睇嚟來頭不小。我細佬入內想買一條，當作宵夜，店員說：「日間很多人買，是要排隊等蛋糕出爐的，如不想排隊，可先電話預訂，約時間到取。現在晚上客少，又剛好有客未到取，你好彩，賣條俾你先啦！」我細佬：「‧‧‧」
蛋糕用個金色紙盒載著，再用絲帶縛好，金光閃閃，好有氣派咁。(回港後，我上網找呢間嘢嘅資料，原來此店真係好有名，好多人讚佢好食；亦好多人彈佢好串。)
返酒店，食蛋糕，好味嗎？細佬兩公婆認為：一般啦！但我兩公婆心裡話：好味好味！因為啱啱遇著剛剛，今日係我倆結婚25週年，嘻。
台北捷運動物園站及貓空纜車   |
台北市動物園     |
 |
坂神本舖長崎蛋糕  |
上一篇： 台北、台中、高雄七天遊 (Day 2)
下一篇： 台北、台中、高雄七天遊 (Day 4)
沒有留言:
發佈留言