早上抵達澳門後，先到威尼斯人睇睇，當然，少不免放低幾兩。
下午，於十月初五街搵食，「舂」咗入間「大龍鳳」飲茶，諗住感受一下老餅茶居風味，點知啲嘢勁難食，四個人食咗六碟點心就走夾唔唞，埋單八十幾皮。其後再沿十月初五街走，响一間叫「牛記」的小餐室食咖哩牛腩麵、油多及豬扒包搞掂個肚。
祭完五臟廟，繼續於沙梨頭、新橋、大三巴、新馬路、崗頂及南灣一帶巡遊。
黃昏，戲肉來了，由於自助山的dinner buffet分6:00pm 及8:00pm兩輪，認真巴閉！我們訂了頭圍，於是5:00pm抵達新葡京，上賭場想話搵番餐晏仔，結果又放低咗幾兩俾阿何生。
新葡京自助山的dinner buffet現時每位$210，加一後承惠$231。縱觀全場，座位寬敞，沒有焗促感，唯一可垢病的，就是有大部份座位距離取食物處頗遠，走幾轉已經腳軟了！不過也可當作幫助消化，食多幾碟。
食品款式可說頗多選擇，包括最受歡迎的生蠔、魚生、壽司、沙律、中式熱葷、灼菜及湯粉麵、燒味、中式點心、日式炸物(最正是天婦羅蝦)、白灼游水大頭蝦、鐵板長腳蟹、西式熱葷(香草燴羊架至好味)、燒牛仔肉、烤全羊、火腿、中西式熱湯(共三款)、朱古力噴泉(兩座)、西式點心、蛋糕、水果、雪糕………等等，款式多樣，不能盡錄！
總括嚟講，我認為新葡京自助山的dinner buffet算物有所值，依我所見，所有食物都不間斷供應，食到你自己收口爲止；不過，七時半未到，就有人嚟提醒你八點前要交檯。食到捧住個肚，咬住枝牙簽，安步當車，沿新口岸行去碼頭，乘船回港。
威尼斯人外貌   |
威尼斯人酒店商場的室內彷威尼斯河道及天幕   |
威尼斯人賭場  |
 |
 |
 |
紅街市  |
普濟禈院(即觀音堂)  |
大三巴附近有條「戀愛巷」，浪漫嗎？   |
聖奧斯定堂， 澳門行政長官辦公室   |
新葡京自助山自助餐廳   |
